ДАРВИ ХЭМЭЭХ НЭРИЙН ДОМОГ

Дайчин баатар Галдан хаан
Дайнаас буцах замдаа
Хөнхөрийн голд хүрээлэн бууж
Хөлстэй тохмоо зөөлөн авлаа

Цаст Сутайдаа мөргөн сууж
Цайныхаа дээжийг өргөн байж
Дайны цагт нөхөр болсон
Дарвидаг хээрээ сэтэрлэж тавилаа
Унасан эзнээ бүү март
Уугуул нутгийнхаа шүтээн бол
Эрчүүд бүхэн нь хийморьтой байг
Эмэгтэй бүхэн нь уран байг
Агт мор нь аргамаг байг
Адуу мал нь олон болог
Олхонууд овогтон хийморьтой байг
Олон үедээ штэгдэж байг
Хээр морио сэтэрлэж тавилаа
Хэрэг зоригоо даатган үлдээлээ
Тэр л цагаас эхлэн
Тэнгэрийн хүлэг хээр морь
Дарвидаг хээрийн нутагласан газрыг
Дарви гэж нэрэлсэн домогтой